WEE D AVIE D AYLICHT keeks owre the sea,
Early in the mornin', wi' a clear e'e;
Waukens a' the birdies that are sleepin' soun',
Wee Davie Daylicht is nae lazy loon.

Wee Davie Daylicht glow'rs owre the hill,
Glints through the greenwood, dances on the rill;
Smiles on the wee cot, shines on the ha';
Wee Davie Daylicht cheers the hearts o' a'.

Come, bonnie bairnie, come awa' to me;
Cuddle in my bosie, sleep upon my knee.
Wee Davie Daylicht noo has closed his e'e.
In amang the rosy clouds, far ayont the sea.