Classic Poem

V ESTIMENTA tuis grata sororibus,
Et donem lapides, quos vel alit Tagi
Fluctus, vel celer undâ
Ganges auriferâ lavit,
Læli, si mea sit dives opum domus:
Quid mittam addubito. Scilicet haud mea
Servo carmina blandis
Nympharum auribus insolens,
Quarum tu potior pectora candidis
Mulces alloquiis, te potiorem amat
Musa, utcunque puellæ
Pulsas Æoliæ fides.
Quin illis acies mittere commodus
Tornatas meditor, quæ bicoloribus
Armis conspiciendæ
Bella inoxia destinant;
Qualis propter aquas aut Lacedæmoni
Eurotæ gelidas, aut Tiberis vada,
Cornicum manus albis
Nigrans certat oloribus.
Cur non sub viridi ludimus ilicis
Umbrâ suppositi? Dic veniat genis
Ridens Lydia pulchris,
Et saltare decens Chloe:
Dic reddant mihi me. Ludite, virgines;
Me testudineis aut Venerem modis
Dicente, aut juvenilis
Telum dulce Cupidinis.