Classic Poem

Lviii. — BALADE

Douce dame, tant vous aim sans meffaire
De cuer, de corps, de desir, de penser,
Que nulle autre, fors vous, ne me puet plaire
En maniere que la peüsse amer.
Et sachies bien que tant vueil endurer
Que, se la mort recevoir en devoie,
N'en recroiray, quoy qu'avenir m'en doie.

Et si me doubt, tres douce debonnaire,
Qui belle et bonne et sage estes sans per,
Qu'il ne doie vo gentil cuer desplaire
L'amour, de coy je vous aim sans fausser
Las! ce me fait languir et desperer.
Mais vraiement, combien qu'il vous anoie,
N'en recroiray, quoy qu'avenir m'en doie;
Eins vueil ades vo dous service faire
Tres loyaument, tant com porray durer,
Com vrais amis qui vous vueil sans retraire
Servir, celer, chierir et honnourer.
Et s'il vous plaist a moy reconforter,
Tres bien feres, car pour mal ne pour joie
N'en recroiray, quoy qu'avenir m'en doie.