Classic Poem

D OLEUR de chief et mal de trenchoisons,
Rage de dens, angoisse de froidure,
Fievres tierces, quartes ne menoisons
Apostumes, clouz, boces, enfonture
Ne mal des yex, qui clarté fait obscure,
Tout ce n'est que soulas, à droit jugier,
Envers soussi de povre mesnagier.

Car quant il doit, il est par tout semons
Et faust que tost poie, quoy qu'il endure;
Et s'on li doit, si pert il ses raisons,
Pour ce qu'il n'a de quoy son droit procure.
Or vueille Diex mettre en tel gent sa cure,
Car il n'est maux, bien le puis tesmoingner,
Envers soussi de povre mesnagier.

Car en touz temps et en toutes saisons,
Li mesnagier povres est en ardure
Comment il puist faire aucun de ses bons;
Mais à tout faut pour sa mesaventure.
Chascun le het, nulz n'a de s'amour cure;
Dont puis tous maus, à droit jugier, changier
Envers soussi de povre mesnagier.