Classic Poem

There cam' a wee boatie owre the sea,
Wi' the winds an' waves it strove sairlie;
But oh! it brought great joy to me,
For wha was there but Prince Charlie.
The wind was hie, and unco chill,
An' a' things luiket barely;
But oh! we cam' with right good-will,
To welcome bonnie Charlie.

Wae's me, puir lad, yere thinly clad,
The waves yere fair hair weeting;
We'll row ye in a tartan plaid,
An' gie ye Scotland's greeting.
Tho' wild an' bleak the prospect round,
We'll cheer yere heart, dear Charlie;
Ye're landed now on Scottish grund,
Wi' them wha lo'e ye dearly.

O lang we've prayed to see this day;
True hearts they maist were breaking;
Now clouds an' storms will flee away,
Young hope again is waking.

We'll sound the Gathering, lang an' loud,
Yere friends will greet ye fairlie;
Tho' now they're few, their hearts are true;
They'll live or die for Charlie.

Prince Charlie he's cum owre frae France,
In Scotland to proclaim his daddie;
May Heaven still his cause advance,
And shield him in his Hieland plaidie!

O my bonnie Hieland laddie,
My handsome, charming Hieland laddie!
May Heaven still his cause advance,
And shield him in his Hieland plaidie!

First when he cam' to view our land,
The gracefu' looks o' the princely laddie
Made a' our true Scots hearts to warm,
And blythe to wear the tartan plaidie.
O my bonnie, &c.

But when Geordie heard the news,
How he was cum afore his daddie,
He thirty thousand pounds wad gi'e,
To catch him in his Hieland plaidie.
O my bonnie, &c.

But tho' the Hieland folks are puir,
Yet their hearts are leal and steady;
And there's no ane amang them a',
That wad betray their Hieland laddie.

O my bonnie Hieland laddie!
My handsome, charming Hieland laddie;
May Heaven still his cause advance,
And shield him in his Hieland plaidie!