Classic Poem

Na vota 'o core mio cantanno jeva
alleramente 'a bella passione,
e 'a bella passione rispunneva
cu tutt' 'ammore e tutt' 'a spressione!
Luceva 'o sole 'a reto a li muntagne,
l'aria serena steva attuorno a me,
adduràvano 'e rrose int' 'e ccampagne
e 'a luna 'a cielo me parlava 'e te!

E me diceva: «Quanto si' felice!
Tiene na stella 'nfronte e n'auta 'ncore!
'O pparlà chiaro è fatto pe' ll'amice,
tutto te canta attuorno: Ammore ammore!
E me diceva pure n'ata cosa!
Me diceva ca tu, sultanto tu
me dive 'a vita prufumata 'e rosa
e ca st'ammore nun mureva cchiù!

Mo, doppo tanto tiempo, è muorto Ammore
e 'a passione se n'è ghiuta a mare!
Resta l'affanno appantanato 'ncore,
restano ll'uocchie, lacremanno amare!
A vita è chesta! Ajere me dicive
ca nun putive sta luntano 'a me,
ogge é nu muorto ca te sonna e scrive
e 'a sottaterra spasema pe' te!