Classic Poem

C' EST grant doleur que d'estre en maladie,
D'avoir les fievres, froidures ou frissons,
Rage de dens et mal d'espidemie,
Estre batu souvent de gros bastons,
Avoir gravelle et mal de trenchoisons,
Si n'est il mal tel, a mon jugement,
Com le meschief que d'avoir pou d'argent.

En droit de moy je ne plaindroie mie
Avoir tous temps les mules es talons,
Les escroelles et mal en la vecie,
Estre roigneux de roigne a gros bourgons
Ou estre point du point d'escorpions,
Si que le mal y perust longuement,
Com le meschief que d'avoir pou d'argent.

Car on em pert toute joieuse vie
Et devient on muz, chagrins et felons,
On n'ose aler en bonne compaignie
Et en pert on l'amour des compaignons.
Si puis prouver, et par bonnes raisons,
Qu'il n'est si grant doleur ne tel torment
Com le meschief que d'avoir pou d'argent.