Classic Poem

Filles, garçons, à paniers pleins
Portez de toute vostre force
Le raisin à la notre escorce
Sur vostre espaule & sur vos reins.
Sus versez dedans le tonneau,
Et des pieds seulement y foulent
Les hommes nuds, & qu'ils escoulent
Des grappes le germe nouueau.
Chacun honore ce bon Dieu
D'vne belle humne de vandanges:
Chacun chante tant de louanges
Qu'on en remplisse tout le lieu.
Qu'on aille voir ce Dieu coulant,
Ce Dieu qui rit dedans la tonne,
Ce Dieu nouueau qu'on emprisonne,
De colere encor tout bouillant.
Si tost que le gentil vieillard
A pris de ce Dieu qui l'enteste,
Tremblant des pieds & de la teste,
Aussi tost il dance gaillard.
Et lors quelque ieune garçon
Amoureux, de pres eschauguette
Le teton de la bergerette,
Qui dort à l'ombre d'vn buisson.
Puis Amour voyant le dessein,
D'vne allechante mignardise,
Donne faueur à l'entreprise,
Et luy met le feu dans le sein.
Le mignon vient, ell'se defend,
Ell'se courrouce, il n'en fait conte,
Mais en fin tellement la donte
Que douce entre ses bras la rend.
Ainsi Bacchus qui fait le ieu,
Ose quelquefois entreprendre
De suborner, & de surprendre
La ieunesse, quand il a beu.