Classic Poem

Donques quelqu'vn a peu grauer
Les flots de la profonde mer?
Et la fureur industrieuse
A peu sur l'eschine écumeuse
De la grand mer, verser de l'eau
Dans le creux d'vn petit vaisseau?
Puis cil qui os a entreprendre
D'y grauer la Cyprine tendre,
Mere du vieil tige des Dieux
Estoit-il pas audacieux?
Voyez comme il la monstre nue,
Cachant dans le sein d'vne nue
De flots, ce qu'il ne faut point voir?
Voyez comme ell' fait son deuoir
Les donter, sur eux apparante
Comme vne écume blanchissante
Au milieu des replis marins,
Quand plus ne paroissent mutins?
Ainsi tire & repousse l'onde
Auecque les flots vagabonde,
Ia ia le tetin pourprissant,
Et ia l'yuoire blanchissant
De son col, la vague surpasse,
Et paroist dans l'humide espace
Comme les lis entortillez
Entre la rose & les œillets.
Voyez les Daulphins qui se ioüent,
Et dessus leur espine noüent
Amour & Cupidon tous nus
Pour tenir escorte à Venus,
Se mocquans des fraudes meschantes
Au cueur des hommes residantes?
Voyez vne grand suitte apres
De Dauphins courbez, qui de pres
La suyuent pour luy faire hommage?
Puis elle approchant le riuage
Esgaye son cueur gentement
En souriant folastrement?