Classic Poem

I haue a yong suster
ffer be-yondyn the se,
many be the drowryis
that che sente me.

che sente me the cherye
with-outyn ony ston,
& so che ded the dowe
with-outyn ony bon.

sche sente me the brer
with-outyn ony rinde,
sche bad me loue my lemman
with-oute longgyng.

how shuld ony cherye
be with-oute ston?
& how shuld ony dowe
ben with-oute bon?

how shuld ony brer
ben with-oute rynde?
how shuld y loue myn lemman
with-out longyng?

Quan the cherye was a flour,
than hadde it non ston.
quan the dowe was an ey,
than hadde it non bon.

Quan the brer was on-bred,
than hadde it non rynd.
quan the maydyn hast that che louit,
che is with-out longing.