Classic Poem

1

I seik aboute this warld onstable
To find a sentence conveniable,
Bot I can not in all my witt
Sa trew a sentence find of it,
As say it is dissavable.

2

For yistirday I did declair
How that the sasoun soft and fair
Come in als fresche as pacok feddir.
This day it stangis lyke ane eddir,
Concluding all in my contrair.

3

Yistirday fair wp sprang the flowris,
This day thai ar all slane with schouris;
And foulis in forrest that sang cleir
Now walkis with ane drerie cheir —
Full caild ar bayth thair beddis and bowris.

4

So nixt to symmer wyntir bene,
Nixt eftir confort cairis kene,
Nixt dirk mydnycht the myrthfull morrow,
Nixt eftir ioy ay cwmis sorrow:
So is this warld and ay hes bene.