Classic Poem

Gin I should live to seeventeen,
Gin Jock should live to twenty,
Gin I be lucky wi' my wheel,
Gin mackerel be plenty,
Gin Jock's auld kizzen gies a boat,
Gin Auntie Jean gies gearin',
Gin Uncle Dauvit gies a goat,
I'll lauch to see the year in.

Gin Minnie gies her braw white hen,
Gin Daddie says, " God bless her! "
Gin plenishin' be spun by then,
Gin Grannie gies the dresser,
Gin Dugald gies the oaken kist
(He'll no' do that, I'm fearin'),
Gin rise the sun wi'out a mist,
I'll lauch to see the year in.

Gin kindly win's the boaties blaw,
Gin saft the auld waves wimple,
Gin ilka net a fu' draucht draw,
Gin plenty shews a dimple,
Gin neebors canty are an' weel,
Gin ilka thing looks cheerin',
Gin no ane hae an empty crool,
I'll lauch to see the year in.

Gin loups the sea on New Year's Day,
Gin shines the red sun rarely,
Gin ilka thing comes as I say,
Gin nature smiles sae fairly,
Gin I get Jock an' Jock gets me,
Gin baith get plenty gearin',
Gin no' a strae should fa' our way,
We'll lauch to see the year in.