Classic Poem

There was a wee bit wifukie was comin' frae the fair,
Had got a wee bit drappukie, that bred her meikle care,
It gaed about the wifie's heart, and she began to spew:
Oh! quo' the wee wifukie, I wish I binna fou.
I wish I binna fou, quo' she, I wish I binna fou,
Oh! quo' the wee wifukie, I wish I binna fou.

If Johnnie find me barley-sick, I 'm sure he 'll claw my skin;
But I 'll lie down and tak' a nap before that I gae in.
Sitting at the dyke-side, and taking o' her nap,
By came a packman laddie wi' a little pack,
Wi' a little pack, etc .

He 's clippit a' her gowden locks, sae bonnie and sae lang,
He 's ta'en her purse and a' her placks, and fast awa he ran;

And when the wifie wakened, her head was like a bee:
Oh! quo' the wee wifukie, this is nae me.
This is nae me, quo' she, this is nae me,
Somebody has been felling me, and this is nae me.

I have a little housikie, but and a kindly man;
A dog, they ca' him Doussiekie, if this be me he 'll fawn.

The night was late, and dang out weet, and oh! but it was dark,
The doggie heard a body's foot, and he began to bark;
Oh! when she heard the doggie bark, and kennin' it was he,
Oh! weel ken ye, Doussie, quo she, this is nae me,
This is nae me, etc .