Classic Poem

Oh, waesome and weary! oh, dowie and eerie!
Auld Scotland mourns wi' a heart sad and wae,
Her ee dimm'd wi' sorrow, frae eenin' to morrow
There's naething can cheer her since Robin 's away.
Her maidens sae peerless, her manhood sae fearless,
Her auld folk and bairnies sae couthy and gay,
Her valleys a' ringin' wi' blythe lasses singin',
Are now dull and lifeless since Robin 's away.

Ilk high misty mountain, and deep foaming fountain,
Ilk lown grassy holmlet and snell heathy brae,
Ilk clear burnie purlin', and dark torrent hurlin',
Are a' sheddin' tears for puir Robin away.
Ilk wee lavrock singin', its way to heaven wingin',
Ilk blackbird and mavis at gloamin' sae grey,
Ilk sweet mountain daisy, oh! wha now will praise ye,
An' gaur us a' lo'e ye, since Robin 's away.

I trow it's nae ferlie, though baith late and early,
Dull daws the mornin' and dark fa's the day,
For why should lorn nature licht up ae bricht feature,
Since her true love Robin is far, far away!
Yet why should it grieve us though death did bereave us
O' that manly form now mouldering in clay?
The voice o' his spirit, rejoice still we hear it,
Its soul-stirring music shall ne'er dee away.