Classic Poem

Madam

Nae Heathen Name shall I prefix,
Frae Pindus or Parnassus;
Auld Reekie dings them a' to sticks
For rhyme-inspiring Lasses.—

Jove's tunefu' Dochters three times three
Made Homer deep their debtor;
But gien the body half an e'e,
Nine Ferriers wad done better.—

Last day my mind was in a bog,
Down George's street I stoited;
A creeping, cauld Prosaic fog
My vera senses doited.—

Do what I dought to set her free,
My Muse lay in the mire;
Ye turn'd a neuk—I saw your e'e—
She took the wing like fire.—

The mournfu' Sang I here inclose,
In Gratitude I send you;
And pray in rhyme, sincere as prose,
A' gude things may attend you.
Robt Burns

St James' Square
Saturday even: