Classic Poem

Hay! now the day dawis;
The jolie Cok crawis;
Now shroudis the shawis,
Throw Natur anone.
The thissell-cok cryis
On lovers wha lyis.
Now skaillis the skyis:
The nicht is neir gone.

The feildis owerflowis
With gowans that growis,
Quhair lilies lyk low is,
Als rid as the rone.
The turtill that trew is,
With nots that renewis,
Hir pairtie persewis:
The night is neir gone.

Now Hairtis with Hyndis,
Conforme to thair kyndis,
Hie tursis thair tyndis,
On grund whair they grone.
Now Hurchonis, with Hairis,
Ay passis in pairis;
Quhilk deuly declaris
The night is neir gone.

The sesone excellis
Thrugh sweetnes that smellis;
Now Cupid compellis
Our hairtis echone
On Venus wha waikis,
To muse on our maikis,
Syn sing, for thair saikis:--
The night is neir gone.

All curageous knichtis
Aganis the day dichtis
The breist plate that bright is,
To feght with thair fone.
The stoned steed stampis
Throw curage and crampis,
Syn on the land lampis:
The night is neir gone.

The freikis on feildis
That wight wapins weildis
With shyning bright shieldis
As Titan in trone:
Stiff speiris in reistis,
Ower cursoris cristis,
Ar brok on thair breistis:
The night is neir gone.

So hard ar thair hittis,
Some sweyis, some sittis,
And some perforce flittis
On grund whill they grone.
Syn groomis that gay is,
On blonkis that brayis,
With swordis assayis:
The night is neir gone.