Classic Poem

Now of wemen this I say, for me:
Off erthly thingis nane may bettir be.
Thay suld haif wirschep and grit honoring
Off men, aboif all vthir erthly thing.
Rycht grit dishonour vpoun him self he takkis,
In word or deid, quha evir wemen lakkis.
Sen that of wemen cumin all ar we,
Wemen ar wemen and sa will end and de.
Wo wirth the fruct wald put the tre to nocht,
And wo wirth him rycht so that sayis ocht
Off womanheid that may be ony lak,
Or sic grit schame vpone him for to tak.
Thay ws consaif with pane, and be thame fed
Within thair breistis thair we be boun to bed.
Grit pane and wo and mvrnyng mervellus
Into thair birth thay suffir sair for ws.
Than meit and drynk to feid ws get we nane,
Bot that we sowk out of thair breistis bane.
Thay ar the confort that we all haif heir,
Thair may no man be till ws half so deir.
Thay ar our verry nest of nvrissing —
In lak of thame quha can say ony thing,
That fowll his nest he fylis, and for thy
Exylit he suld be of all gud cumpany.
Thair suld na wyis man gif audience
To sic ane fule without intelligence.
Chryst to his fader he had nocht ane man;
Se quhat wirschep wemen suld haif than.
That sone is lord, that sone is king of kingis,
In hevin and erth his maiestie ay ringis.
Sen scho hes borne him in hir halines,
And he is well and grund of all gudnes,
All wemen of ws suld haif honoring,
Serwice and luve, aboif all vthir thing.