Classic Poem

Declair ye bankis of Helicon
Pernassus hillis and daillis ilkon
and fontaine Caballein
gif onye of your muses all
or nymphes may be peregall
unto my ladye schein,
or of the ladyis that did lave
thair bodyis by your brim
so seimlie war or yit sa suave
so bewtiful or trim.
Contempill,
exempill
take be hir proper port
gif onye
so bonye
amang you did resort.

No no forsuith wes never none
that with this perfyte paragon
in beawtie micht compair.
The muses wald have gevin the grie
to hir as to the Aperse
and peirles s perle preclair,
thinking with admiratioun
hir persone so perfyite
nature in hir creatioun
to forme hir tuik delyite.
Confes then
expres then
your nymphes and all thair trace
for bewtie
of dewtie
sould yeild and give hir place. . . .