Classic Poem

Son gent corps fait à tour
Et son faitis atour,
Son regart sans folour
M'ont et toute m'amour.
Et sa fresche coulour,
Qui passe en douce odour
Rose et lis en blanchour,
Fruit, grainne et toute flour,
Quant elle est en verdour,
Fait que toudis m'atour
D'estre liez sans irour,
Pour ce que siens demour.
Et sa fine douçour
Adoucist ma dolour,
Amenrist mon labour,
Efface ma tristour
Et fait tarir mon plour,
Se je souspir ou plour
Pour s'amour en destour
Où souvent me destour,
Quant mon viaire esplour
Et s'à li fais clamour,
En doubt et en cremour,
De desir, qui freour
Met en moy et rumour
Et me fait maint estour,
Dont mi mal sont piour
Et dont je descolour,
Mi mal en sont menour.
Et sa haute valour
Qui n'a per ne gringnour,
Sans faire en moy retour,
Tient mon cuer en la tour
De joie et de baudour;
Franchise est tout entour
Et autres biens plusour,
Qui gardent le contour
Qu'il n'i veingne laidour,
Ordure ne puour,
Espine ne liquour,
Ne racine ne humour,
Qui le mette en errour
De penser villain tour
Contre mon droit signour
A qui toudis retour.
C'est elle que j'aour,
Sers, criem, lo et honnour,
Sans cesser, nuit et jour,
En ce noble sejour,
De toute ma vigour,
Sans penser deshonnour;
Dont l'amoureuse ardour,
Qui fait en moy demour,
Et suer sans chalour
Et trambler sans froidour
Me fait par sa vigour
Et par humble tenrour,
M'a, quant bien l'assavour
De mercy la savour.
Si n'ay de riens paour
Fors de ce que mi jour
Ne finent trop tost pour
Li servir à s'onnour,
Pour ce qu'il n'est plus belle ne millour.