Tune, Rothiemurche's rant

Chorus

Lassie wi' the lintwhite locks,
Bonie lassie, artless lassie,
Wilt thou wi' me tent the flocks,
An wilt thou be my Dearie O. —

Now Nature cleeds the flowery lea,
And a' is young and sweet like thee,
O wilt thou share its joys wi' me,
And say thou'lt be my Dearie O. —
Lassie &c. —

The primrose bank, the wimpling burn,
The cuckoo on the milkwhite thorn,
The wanton lambs at rosy morn
Shall glad thy heart, my Dearie O.
Lassie &c. —

And when the welcome simmer shower
Has chear'd ilk drooping little flower,
We'll to the breathing woodbine bower
At sultry noon, my Dearie O.
Lassie, &c. —

As Cynthia lights, wi' silver ray,
The weary shearer's hameward way,
Through yellow waving fields we'll stray,
And talk o' love, my Dearie O.
Lassie &c. —

And should the howling wintry blast
Disturb my lassie's midnight rest,
I'll fauld thee to my faithfu' breast,
And comfort thee, my Dearie O.
Lassie &c. —