Classic Poem

John Anderson's Reply to his Wife, Jean.

Jean Anderson, my braw Jean,
It's true whate'er ye say, —
Your word to me's a law, Jean,
I couldna whisper nay.
Ye're still a frugal wife, Jean,
An' aye sae trig an' clean;
O ye're dearer tae your John than life!
My faithfu', carefu' Jean.

Jean Anderson, my braw Jean,
Though we are up in years,
An' frailties on us draw, Jean,
That maunna cost us tears.
While ye wi' life are blest, Jean,
Nae grief can weet my een;
For your face sets a' my mind tae rest,
My ain true-hearted Jean.

Jean Anderson, my braw Jean,
Ye were my youth's desire;
I lo'ed you wi' an awe, Jean,
O' luve that couldna tire.
Our joys ha'e been complete, Jean,
As mony years ha'e seen;
An' though we die, its but tae meet,
Tae part nae mair, my Jean.