Classic Poem

ODE

 Pour garder que le plaisir
Qui nous vient ore saysir
De longtemps ne nous eschappe,
Du Buys, fais porter la nappe,
Et dresser viste à manger.
Tandis je vaiz arranger
Deça et delà Catulle,
Properce, Ovide, et Tibulle,
Dessus la table espendus,
Entre les lucz bien tendus;
Et les lucz entre les rozes,
Et les rozes my decloses
Entre les œilletz fleuriz,
Les œilletz entre les liz,
Et les liz entre les tasses,
Parmy les vaisselles grasses.

 La mort, peult-estre, demain
Viendra prendre par la main
Le plus gay de ceste trouppe
Pour l'enlever sur sa croupe;
Luy disant à l'impourveu
Sus gallant, c'est assez beu,
Il est temps de venir boire
Aux enfers de l'onde noire.