Classic Poem

Oh, rosy are the eastern skies
At dawn o' summer mornin',
But brighter are the gowden dyes
The e'ening skies adornin';
Oh pure the love o' her wha's charms
May grace the hamely plaiden,
But purer far the love that warms
The Auld Aunty Maiden.
Then twine it weel, then twine it weel,
Then twine it weel the plaiden;
There's name e'er twined or span for me
Like my dear Aunty Maiden.

Oh, how may hand-bound minnie get
Her tottums clad sae gaily?
The youngest aye is Aunty's pet,
Wha brings him presents daily.
An' wha wad tak the orphan's part.
An' twine for him the plaiden,
An 'twerena for the kindly heart
O' his dear Aunty Maiden?
Then twine it weel, &c.

Oh, mutual love is mutual bliss,
Young mou's were made for preein',
An' when we pree the half-stoun kiss,
We're gettin' whaur we're geein'.
But there's a love seeks nae return
Frae them wi' poortith laden —
A heart to beat for them wha mourn
A kindly Aunty Maiden.
Then twine it weel, and twine it weel,
Then twine it weel the plaiden,
There's nane e'er twined or toil'd for me,
Like my Auld Aunty Maiden.