Classic Poem

Adeu O Desie of delyt
Adeu most plesand and perfyt
Adeu and haif gude nicht.
Adeu thou lustiest on lyve
Adeu suete thing superlatyve,
Adeu my lamp of licht.
Lyk as the lyssard does indeid
Leiv by the manis face,
Thy beutie lykwyse suld me feid
If we had tyme and space.
Adeu nou be treu nou
Sen that we must depairt.
Foryet not and set not
At licht my constant hairt.

Albeit my body be absent
My faithfull hairt is vigilent
To do you service true,
Bot when I hant into the place
Whair I wes wont to sie that face
My dolour does reneu.
Then all my plesur is bot pane
My cairis they do incres,
Untill I sie your face agane
I live in hevynes.
Sair weeping but sleeping
The nichts I ouerdryve,
Whylis murning, whylis turning
With thoght i s pensityve.

Somtym good hope did me comfort,
Saying the tym suld be bot short
Of absence to endure.
Then Curage quickins so my spreit
When I think on my lady sueet
I hald my service sure.
I can not plaint of my estait
I thank the Gods above,
For I am first in hir consait
Whom both I serve and love.
Hir freindis ay weindis
To caus hir to revok,
Sho bydis and slydis
No more than does a Rok.

O Lady for thy Constancie
A faithfull servand sall I be,
Thyn honour to defend
And I sall surelie for thy saik
As doth the turtle for her maik
Love to my lyfis end.
No pane nor travell, feir nor dreid
Sall caus me to desist.
Then ay when ye this letter reid
Remember hou we kist,
Embracing, with lacing
With others teirs sueet,
Sik blissing in kissing
I quyt till we tua meit.