Classic Poem

As the auld cock craws, sae the young cock learns:
Aye tak ye care what ye do afore bairns;
Their heads are muckle, though their limbs are wee,
An' oh! the wee totts are gleg in the ee:
Then dinna fricht your laddie wi' the " black boo " man,
But let him douk his lugs in his wee parritch pan;
Lay ye his rosy cheek upon your mou' a wee,
How the rogue will laugh when his minny's in his ee!

As the auld cock craws, sae the young cock learns:
Aye tak ye care what ye do afore bairns;
Though vice may be muckle, and virtue may be wee,
Yet a sma' speck o' light will woo the dullest ee:
Then dinna fricht us a' wi' the muckle black deil,
But show us mercy's bonnie face, an' teach us to feel;
Though we think like men, we should feel like bairns,
As the auld cock craws, sae the young cock learns.