Classic Poem

Chorus —

Ca' the yowes to the knowes,
Ca' them whare the heather grows,
Ca' them whare the burnie rowes,
My bonie Dearie.

1

Hark, the mavis' evening sang
Sounding Clouden's woods amang;
Then a faulding let us gang,
My bonie Dearie.
Ca' the &c.

2

We'll gae down by Clouden side,
Through the hazels spreading wide
O'er the waves, the sweetly glide
To the moon sae clearly.
Ca' the &c.

3

Yonder Clouden's silent towers,
Where at moonshine midnight hours
O'er the dewy bending flowers
Fairies dance sae cheary.
Ca' the &c.

4

Ghaist nor bogle shalt thou fear;
Thou'rt to Love and Heaven sae dear,
Nocht of Ill may come thee near,
My bonie Dearie.
Ca' the &c.

5

Fair and lovely as thou art,
Thou hast stown my very heart;
I can die — but canna part,
My bonie Dearie.
Ca' the &c.