Ye hevins abone with heavenlie ornaments
Extend your courtins of the cristall air!
To asuir colour turne your elements,
And soft this season, quhilk hes bene schairp and sair.
Command the cluds that they dissolve na mair;
Nor us molest with mistie vapours weit.
For now scho cums, the fairest of all fair,
The mundane mirrour of maikles Margareit.

The myildest may; the mekest, and modest;
The fairest flour, the freschest flourishing;
The lamp of licht; of youth the lustiest;
The blythest bird, of bewtie maist bening;
Groundit with grace, and godlie governing,
As A per se , abone all elevat.
To quhame comparit is na erthlie thing;
Nor with the gods so heichlie estimate.

The goddes Diana, in hir hevinlie throne,
Evin at the full of all hir majestie,
Quhen she belev't that danger was thair none,
Bot in hir sphere ascending up maist hie,
Upon this nymph fra that scho cast hir ei,
Blusching for schame, out of hir schyne she slippis.
Thinking scho had bene Phebus verilie,
At whose depairt scho fell into th' eclippis.

The asters cleir, and torchis of the nicht,
Quhilk in the sterrie firmament wer fixit,
Fra thay persavit Dame Phaebe los hir licht,
Lyk diamonts with cristall perls mixit,
They did discend to schyne this nymph annixit;
Upon hir schoulders twinkling everie on.
Quhilk to depaint it wald be owr prolixit,
How thay in ordour glister on hir gown.

Gif she had bein into the dayis auld,
Quhen Jupiter the schape of bull did tak,
Befoir Europe quhen he his feit did fauld,
Quhill scho throw courage clam upon his bak.
Sum greater mayck, I wait, he had gart mak,
Hir to have stolin be his slichtis quent;
For to have past abone the zodiak,
As quein, and goddes of the firmament.

With golden schours, as he did Clemene,
He wald this virgine furteously desave,
Bot I houp in the goddes Hemene,
Quhilk to hir brother so happie fortoun gave,
That scho sall be exaltit, by the laif,
Baith for hir bewtie, and hir noble bluid.
And of myself ane servand scho sall haif
Unto I die: and so I doe conclud.