Classic Poem

As I gaed down to Collistown
Some white fish for to buy,
The cunning clerk he followed me,
And he followed me speedily;
[And he followed me, followed me,
Followed me speedily.]

Says, Faur ye gaun, my dearest dear?
O faur ye gaun, my dow?
There 's naebody comes to my bedside,
And naebody wins to you.

Your brother is a gallant square wright,
A gallant square wright is he;
Ye'll gar him make a lang ladder
Wi' thirty steps and three.

And gar him big a deep, deep creel,
A deep creel and a string,
And ye'll come up to my bedside
And come bonnily linken in.

The auld gudeman and auld gudewife,
To bed they went to sleep;
But wae mat worth the auld gudewife,
A wink she cou'dna get.

I dream'd a dreary dream this night,
I wish it binna true,
That the rottens had come thro' the wa'
And cutted the coverin' blue.

Then up it raise the auld gudeman,
To see gin it was true;
And he 's gane to his daughter dear,
Says, What are ye doing, my dow?

What are ye doing, my daughter dear?
What are ye doing, my dow?
The prayer book 's in my hand, father,
Praying for my auld minnie and you.

The auld gudeman and auld gudewife,
To bed they went to sleep;
But wae mat worth the auld gudewife,
But aye she waken'd yet.

I dream'd a dreary dream this night,
I wish it binna true,
That the cunning clerk and your ae daughter
Were aneath the coverin' blue.

O rise yoursell, gudewife, he says,
The diel may had you fast;
Atween you and your ae daughter
I canna get ae night's rest.

Up then raise the auld gudewife
To see gin it was true,
And she fell arselins in the creel
And up the string they drew.

Win up, win up, gudeman, she says,
Win up and help me now;
For he that ye ga'e me to last night,
I think he 's catch'd me now.

Gin Auld Nick he has catch'd you now
I wish he may had you fast;
As for you and your ae daughter,
I never get kindly rest.

They howded her and they showded her
Till the auld wife gat a fa',
And three ribs o' the auld wife's side
Gaed knip knap ower in twa.