Ye prowd galonttes hertlesse,
With your hyghe cappis witlesse,
And youre schort gownys thriftlesse,
Have brought this londe in gret hevynesse.

With youre longe peked schone,
Therfor your thrifte is almost don,
And with youre long here into your eyen,
Han brought this lond to gret pyne.

Ye poopeholy prestis fulle of presomcioun,
With your wyde furryd hodes voyd of discrecioun,
Unto your owyn prechyng of contrary condicioun,
Wheche causithe the people to have lesse devocioun.

Avauncid by symony in cetees and townys,
Make schorter youre taylis and broder your crounys;
Leve your schort stuffide dowbelettes and your pleytid gownys,
And kepe your owyn howsyng, and passe not your boundis.

Repreve non other men, I schalle telle you whye,
Ye be so lewyd youer selfe, there settithe no man you bye,
It is not but a schame y[e] wold be callyd holly,
And worse dysposyd people levythe not undir the skye.

Ffirst make fre your selfe, that now to syne be bounde,
Leve syne, and drede it, than may ye take on hand
Othir to repreve, and that I undirstonde,
Ye may amende alle other and bryng pese to londe.