Heyl, Levedy, see-sterre bright,
Godes moder, edy wight,
Maiden ever furst and late,
Of heveneriche sely gate,
Thilk Ave that thou fonge in spel
Of the aungeles mouth cald Gabriel:

In grith us sette and shild from shome,
That turnst abakward Eves nome;
Gulty monnes bond unbind;
Bring light til hem that beoth blind.
Put from us oure sunne
And ern us alle wunne.

Show that thou are moder one,
And he for thee take oure bone
That for us thy child bicom,
And of thee oure kunde nom.
Maide one thou were mid childe
Among alle so milde.

Of sinne us quite on haste
And make us meke and chaste.
Lif thou gif us clene;
Wey siker us yarke and lene
That we Jesus isee
And ever blithe be.

To Fader, Crist and Holy Gost be thonk and heryinge;
To three persones and o God, o menske and worshipinge.