Classic Poem

Allace depairting, grund of wo,
Thou art of everilk joy ane end!
How suld I pairte my lady fro?
How suld I tak my leif to wend?
Sen fals Fortoun is nocht my frend,
Bot evir castis me to keill,
Now sen I most no langir lend,
I tak my leif aganis my will.

Fairweill, fairweill, my weilfair may;
Fairweill, fegour most fresche of hew;
Fairweill, the saiffar of assay;
Fairweill, the hart of quhyt and blew;
Fairweill, baith kynd, curtas and trew;
Fairweill, woman withowttin ill;
Fairweill, the curnliest that evir I knew.
I tak my leif aganis my will.

Fairweill, my rycht fair lady deir;
Fairweill, most wys and womanlie;
Fairweill, my lufe fro yeir to yeir;
Fairweill, thow beriall blycht of blie;
Fairweill, leill lady liberall and fre;
Fairweill, that may me saif and spill;
Howevir I fair, go fair weill ye;
I tak my leif aganis my will.

Fairweill fra me, my gudly grace;
Fairweill, the well of wirdines;
Fairweill, my confort in everilk place;
Fairweill, the hoip of steidfastnes;
Fairweill, the rut of my distres;
Fairweill, the luffar trew and still;
Fairweill, the nureis of gentilnes;
I tak my leif aganis my will.