Classic Poem

Gastly gladnes in Jhesu, and joy in hert, with swetnes in sawle of þe savor of heven in hope, es helth intil hele, and my lyfe lendes in luf, and lyghtsumnes unlappes my thoght. I drede noght þat me may wyrk wa, sa mykel I wate of wele. It war na wonder if dede war dere þat I myght se hym þat I seke; bot now it es lenthed fra me, and me behoves lyf here til he wil me lese. Lyst and lere of þis lare, and þe sal noght myslike. Lufe make me to melle, and joy gars me jangell. Loke þow lede þi lyf in lyghtsumnes; and hevynes, helde it away. Sarynes, lat it noght sytt wyth þe; bot in gladnes of God, evermare make þow þi gle. Amen.