Classic Poem

Ir sult sprechen willekomen:
der iu maere bringet, daz bin ich.
Allez daz ir habt vernomen,
daz ist gar ein wint: na frâget mich.
Ich wil aber miete:
wirt min lon iht guot,
ich gesage iu lihte daz iu sanfte tuot.
seht waz man mir êren biete.

Ich wil tiuschen frouwen sagen
solhiu maere daz si deste baz
Al der werlte suln behagen:
âne groze miete tuon ich daz.
Waz wold ich ze lone?
si sint mir ze hêr.
so bin ich gefüege und bite si nihtes mêr
wan daz si mich grüezen schone.

Ich hân lande vil gesehen
unde nam der besten gerne war:
├£bel müeze mir geschehen,
kunde ich ie min herze bringen dar
Daz im wol gevallen
wolde fremeder site.
na waz hulfe mich, ob ich unrehte strite?
tiuschiu zuht gât vor in allen.

Von der Elbe unz an den Rin
und her wider unz an Ungerlant
Mugen wol die besten sin,
die ich in der werlte hân erkant.
Kan ich rehte schouwen
guot gelâz unt lip,
sem mir got, so swüere ich wol daz hie diu wip
bezzer sint danne ander frouwen.

Tiusche man sint wol gezogen,
rehte als engel sint diu wip getân.
Swer si schildet, derst betrogen:
ich enkan sin anders niht verstân.
Tugent und reine minne,
swer die suochen wil,
der sol komen in unser lant: da ist wünne vil!
lange müeze ich leben dar inne!

Der ich vil gedienet hân
und iemer mêre gerne dienen wil,
Diust von mir vil unerlân.
iedoch so tuot si leides mir so vil.
Si kan mir versêren
herze und den muot.
na vergebez ir got dazs an mir missetuot.
her n├óch mac si sichs bekêren.