Classic Poem

A Ballad

O blythly would I gang wi' you
My winsome Hielan' laddie,
And blythly share your heather bed
Gin 't warna for my daddie.

What needs ye fear for him, my doo,
The carle daurna follow —
O'er mosses wide an' Hielan' hills
We 'll win 'or come the morrow.

But O my heart wad be sae sair
To lea' my kindly minny,
She lo'es me best o' a' I ken: —
What can I do my hinny?

Gin ye will gang wi' me I swear
For hame ye ne'er sall canker;
My love will be to you a beild
And you my heart sall anchor.

But O, altho' I lo'e ye weel
And ye my heart hae taken
I canna bear to steal frae hame
And lea' my folk forsaken.

Then I maun to the North my lane
Afore day licht be dawin' —
For tartan plaids sae far be-south —
A halter is the lawin'.