Classic Poem

Auld Johnnie comes ower and he cracks wi' my mither,
The auld warld carle is pawky an' slee;
Lang Sandy gangs out an' gets fu' wi' my brither,
And bribes the poor coof to be blackfoot to me.
But my manly Jamie, wi' forehead sae hie,
Has a lowe in his cheek, an' a star in his ee;
I wotna gin Jamie e'er cracks o' puir Phemie,
But weel do I wot a' his thoughts are wi' me.

I wotna how worth is sae bashfu' and backward,
I wotna how fools are sae forward an' free,
I wotna how Jamie's sae blate and sae awkward,
I wotna what gaurs my heart wander ajee;
But ah! there's a flame that the world canna see,
In the slee keekin' glance o' a love-lichted ee;
An' Jamie's aye keekin', while others are speakin',
An' I wad keek too, but he's keekin' on me.