To Keep the Cold Wind Away

There blows a colde wynd todaye, todaye,
The wynd blows cold todaye;
Cryst sufferyd his passyon for manys saluacyon,
To kype the cold wynd awaye.

Thys wynde be reson ys callyd tentacyon;
Yt rauyghth both nyghth and daye.
Remember, man, how the Sauyor was slayne
To kype the colde wynde awaye.

Pride and presumcyon and fals extorcyon,
That meny man dothe betraye—
Man, cum to contrycyon and axe confessyon
To kype the colde wynd awaye.

O Mary myld, for love of the chyld
That dyed on Good Frydaye,
Be owr saluacyon frome mortall damnacyon,
To kype the cold wynd awaye.

He was naylyd, his blode was halyd,
Owre remyssyon for to by,
And for owr synnys all he dronke both eysell and gall,
To kype the cold wynd awaye.

Slowthe, enuy, couytis, and lechere
Blewe the cold wynd, as Y dare saye;
Agene suche pusyn he sufferryd his paysscyon
To kype the cold wynd awaye.

O man, remember the Lord so tender
Whyche dyed withowte denaye;
Hys hondes so smert laye next to his hart
To kype the cold wynd awaye.

Now pray we all to the Kyng selestyall,
That borne he was off mayde,
That we maye loue so with other mo,
To kype the cold wynd awaye.

At the day of dome when we schall cum
Owr synns not for to denaye,
Mary, praye to the Sone that syghthy yn hys trone
To kype the cold wynd awaye.

At the last ynde, man, thou schalt send
And kype bothe nyghth and daye;
The most goodlyst tresyor ys Cryst the Sauyor
To kype the cold wynd awaye.

Here let vs ynde, and Cryst vs defend
All be the nyghth and be daye,
And bryng vs to hys place where ys myrthe and solas
To kype the cold wynd awaye.
Translation: 
Language: 
Rate this poem: 

Reviews

No reviews yet.