Classic Poem

I'm wearing awa', Jean,
Like snaw when its thaw, Jean,
I'm wearing awa'
To the land o' the leal.
There's nae sorrow there, Jean,
There's neither cauld nor care, Jean,
The day is ay fair
In the land o' the leal.

Ye were ay leal and true, Jean,
Your task's ended noo, Jean,
And I'll welcome you
To the land o' the leal.
Our bonnie bairn's there, Jean,
She was baith guid and fair, Jean;
O we grudged her right sair
To the land o' the leal!

Then dry that tearfu' e'e, Jean,
My soul langs to be free, Jean,
And angels wait on me
To the land o' the leal.
Now fare ye weel, my ain Jean,
This warld's care is vain, Jean;

We'll meet and ay be fain
In the land o' the leal.