Classic Poem

Jockie is decked in his braw ruffled sark,
Wi' siller buckles at ilka knee;
He skips like a bird ower the lang grass park,
To shaw his braws aff to Leezie Lee.
An' pawky is he, an' pawky is she,
An' wow but they baith are ower lang free;
For diamond gaurs diamond in flinders flee;
Jockie is gleg, sae is Leezie Lee.

He was a warlock, an' she was a witch,
Glamour meets glamour, an' nane can see;
She took him for braw, he took her for rich;
Fowls o' a feather thegither flee.
Jockie's a bridegroom, and Leezie a bride,
Weel may they sowther, an' weel may they gree;
But Jockie has nought to keep up his pride,
An' no ae boddle has Leezie Lee.

Why should ye cozen the lassie ye like?
Why wad ye feign what ye ne'er can be?
Gin ye canna help her out ower the dike,
Ye better wait till the yett 's ajee.
Ye far better loot down and pu' the gowan,
Than seek for fruit frae a sapless tree;
Better no climb than come doun the hill rowin',
Wi' a stane round your neck like Leezie Lee.