Classic Poem

My folk, what habbe I do thee,
Other in what thing teened thee?
Gin nouthe and answere thou me.

For from Egypte ich ladde thee
Thou me ledest to roode-tree
My folk, what habbe I do thee? etc .

Through wildernesse ich ladde thee,
And fourty yeer bihedde thee,
And angeles bred ich yaf to thee,
And into reste ich broughte thee.
My folk, what habbe I do thee? etc .

What more shulde ich haven y-don
That thou ne havest nought underfon?
My folk, what habbe I do thee? etc .

Ich thee fedde and shrudde thee,
And thou with eisil drinkst to me,
And with spere stingest me.
My folk, what habbe I do thee? etc .

Ich Egypte beet for thee,
And here teem I slow for thee,
My folk, what habbe I do thee? etc .

Ich delede the see for thee,
And dreinte Pharaon for thee,
And thou to princes sellest me.
My folk, what habbe I do thee? etc .

In beem of cloude ich ladde thee,
And to Pilat thou ledest me.
My folk, what habbe I do thee? etc .

With angeles mete ich fedde thee,
And thou bufetest and scourgest me.
My folk, what habbe I do thee? etc .

Of the stone ich drank to thee,
And thou with galle drincst to me.
My folk, what habbe I do thee? etc .

Kinges of Canaan ich for thee beet,
And thou betest myn heved with reed.
My folk, what habbe I do thee? etc .

Ich yaf thee crowne of kinedom,
And thou me yifst a crowne of thorn.
My folk, what habbe I do thee? etc .

Ich muchel worship dide to thee,
And thou me hangest on roode-tree.
My folk, what habbe I do thee? etc .