Classic Poem

She was Naebody's Bairn, she was Naebody's Bairn,
She had mickle to thole, she had mickle to learn,
Afore a kind word or kind look she could earn,
For naebody cared about Naebody's Bairn.

Tho' faither or mither ne'er owned her ava,
Tho' reared by the fremmit for fee unca sma',
She grew in the shade like a young lady-fern;
For Nature was bounteous to Naebody's Bairn.

Tho' toited by some, and tho' lightlied by mair,
She never compleened, tho' her young heart was sair;
And warm virgin tears that might melted cauld airn
Whiles glist in the blue ee o' Naebody's Bairn.

Though nane cheered her childhood, an' nane hailed her birth,
Heaven sent her an angel to gladden the earth;
And when the earth doomed her in laigh nook to dern,
Heaven couldna but tak again " Naebody's Bairn. "

She cam smiling sweetly as young mornin' daw,
Like lown simmer gloamin' she faded awa,
And lo! how serenely that lone e'enin' starn
Shines on the green sward that haps Naebody's Bairn!