Classic Poem

1

Thir ladeis fair that maks repair
And in the courte ar kend,
Thre dayis thair thai will do mair,
Ane mater for to end,
Than thair gudmen will do in ten
For ony craift thai can.
So weill thai ken quhat tyme and quhen
Thair meynis thai sould mak than.

2

Withe litill noy thai can convoy
A mater finalie,
Yit myld and moy thai keip it coy
On ewynnis quyetlie.
Thai do no mys, bot gif thai kys
And kepis collatioun,
Quhat rak of this? The mater is
Brocht to conclusioun.

3

Ye may wit weill, thai haue grit feill
A mater to solist.
Traist as the steill, syne never a deill
Quhone thai cum hame is myst.
Thir lairdis ar, me think, rycht far
Sic ladeis behaldin to,
That sa weill dar go to the bar,
Quhone thair is ocht ado.

4

Thairfoir, I rid, gif ye haue pleid
Or mater in to pley,
To mak remeid, send in your steid
Your ladeis, grathit vp gay.
Thai can defend, ewin to the end,
Ane mater furthe expres.
Suppois thai spend, it is onkend,
Thair geir is not the les.

5

In quyet place, and thai haue space,
Within les nor twa houris,
Thai can, percace, purches sic grace
At the compositouris,
Thair compositioun, without suspitioun,
Thair finalie is endit,
With expeditioun and full remissioun,
And selis thairto appendit.

6

All haill almoist thai mak the coist
With sobir recompence.
Rycht litle loist, thai get indoist
All haill thair evidens.
Sic ladyis wyis ar all to pryis,
To say the verite,
Sic can devyis, and none supprys
Thame throw thair honeste.