Classic Poem

I.

For a' the gaets that I hae been,
And a' the lasses I hae seen,
The like o' her I met yestreen
I never saw at dancin' O!
She reelt aboot wi' sic a grace —
In an' out, she reelt aboot;
Reelt aboot wi' sic a grace,
I vow she was entrancin' O!
The womenfolk were a' but mad,
For deil a ane could keep her lad;
They ca'd her for a wanton jade,
Sae witchin' was her glancin' O.

II.

Her bonnie een were o' the blue
But whether gleamin' fause or true,
They had the licht that lovers drew,
And ne'er a lad can swither o'.
Like moths she drew them round about —
Drew them round, drew them round:
Like moths she drew them round about
Till some their wings did wither O.
And then she led them but an' ben
Wi' a' the arts that women ken,
Until the women thocht their men
Had a' gane gite thegither O.

III.

But O she was a handsome lass!
And with a wit that did surpass,
As diamond does the common glass,
She fooled us to our faces O.
But wha the deil could wish her ill —
Wha the deil, wha the deil:
He wasna man could wish her ill
That had sae mony graces O.
The like o' her ye never saw —
She 'd gar the best forhoo the Law
For sic a witch did Adam fa'
An' coup the holy traces O!