A Wyf of Bathe


A good Wyf was ther of bisyde Bathe,
But she was som-del deef, and that was scathe.
Of clooth-making she hadde swiche an haunt,
She passed hem of Ypres and of Gaunt.
In al the parisshe wyf ne was ther noon
That to th' offring bifore hir sholde goon;
And if ther dide, certeyn, so wrooth was she,
That she was out of alle charitee.
Hir coverchiefs ful fyne were of ground;
I dorste swere they weyeden ten pound
That on a Sonday were upon hir heed.
Hir hosen weren of fyn scarlet reed,
Ful streite y-teyd, and shoos ful moiste and newe.
Bold was hir face, and fair, and reed of hewe.
She was a worthy womman al hir lyve,
Housbondes at chirche-dore she hadde fyve,
Withouten other companye in youthe;
But therof nedeth nat to speke as nouthe.
And thryes hadde she been at Jerusalem;
She hadde passed many a straunge streem;
At Rome she hadde been, and at Boloigne,
In Galice at seint Jame, and at Coloigne.
She coude muche of wandring by the weye:
Gat-tothed was she, soothly for to seye.
Up-on an amblere easily she sat,
Y-wimpled wel, and on hir heed an hat
As brood as is a bokeler or a targe;
A foot-mantel aboute hir hipes large,
And on hir feet a paire of spores sharpe.
In felawschip wel coude she laughe and carpe.
Of remedyes of love she knew perchaunce,
For she coude of that art the olde daunce.
Rate this poem: 


No reviews yet.