Classic Poem

Wee Boo Peep, he lies rowin' on the floor,
Rum tumblin' up an' doun, dorty an' dour;
Sour as a sourack, and round as a neep,
A queer wirly warly is our Boo Peep.

Wee Boo Peep, he dances and he sings,
He laughs and he skirls till the hale house rings;
His fair wee face whiles is black as a sweep,
But warm are the lips aye o' Wee Boo Peep.

Wee Boo Peep, he chuckles and he leers,
His een glist wi' glee, or glammerit wi' tears;
He craws like a cock, he baas like a sheep,
Ye canna tell what's up wi' Wee Boo Peep.

Wee Boo Peep, gin ye ettle him to check,
He'll clamber your knee, an' he'll cling round your neck,
He'll gaur your mou' smack with sae couthie a cheep,
Ye canna speak a harsh word to Wee Boo Peep.

Wee Boo Peep, he is slippery as an eel,
Gleg as a wummle, and fleet as a wheel;
He rows doun the brae, he rins up the steep,
Here, there, everywhere, is Wee Boo Peep.

Wee Boo Peep, his banes maun whiles be sair,
Fa'in' aff stools, or tumblin' doun the stair;
But whaur is the heicht whaur he winna creep?
He'll ride on the riggin' yet, Wee Boo Peep.